Рим папаси Лев XIV: "Мен сиёсатчи эмасман. Менинг вазифам — тинчликни тарғиб қилиш"

Рим папаси Трамп билан баҳслашиш нияти йўқлигини маълум қилди.

Лев XIV Алжирга кетаётган самолёт бортида журналистлар билан суҳбатда Доналд Трамп билан дебатларга киришмаслигини билдирди.

"Мен сиёсатчи эмасман. Менинг вазифам — тинчликни тарғиб қилиш", — дея таъкидлади понтифик.

Аввалроқ Доналд Трамп ўзининг Truth Social тармоғида папани "радикал сўллар"га ён босишда ва Эрон ҳамда Венесуэла масаласида "даҳшатли" ташқи сиёсат юритишда айблаган эди.

Трамп, шунингдек, агар у Оқ уйда бўлмаганида, Лев XIV Ватиканда бўлмаслигини даъво қилиб, папани ядро қуроли ва жиноятчиликка қарши курашда "кучсиз" деб атаган эди.