Reuters: АҚШ Федерал қидирув бюроси Трампга қарши терговда қатнашган бир нечта агентларини ишдан бўшатди

Агентликнинг ўз манбаларига таяниб хабар беришича, Федерал қидирув бюроси (ФҚБ) собиқ махсус прокурор Жек Смит жамоасида ишлаган ва президент Доналд Трампнинг фаолиятини тергов қилган тўрт нафар агентни ишдан бўшатган.

Аввалроқ АҚШ Сенатининг юридик қўмитаси раиси, республикачи Чак Грассли Смит жамоаси олиб борган терговга оид минг бетдан ортиқ ҳужжатларни эълон қилган эди. Мазкур ҳужжатларда терговда иштирок этган ФҚБ ва Адлия вазирлиги ходимларининг исмлари яширилмаган.

Жек Смит Доналд Трампга федерал сайловлар жараёнига аралашиш, яъни тарафдорларининг Капитолийга бостириб кириши ҳамда махфий ҳужжатлар билан ноўрин муомала қилиш бўйича айбловлар қўйган эди. Бироқ 2024 йилнинг ноябр ойида Трамп президентлик сайловларида ғалаба қозонганидан сўнг, махсус прокурор бу терговни тўхтатди.

Шу билан бирга, Смит ўз қўлида Трампни судда айблаш учун етарли далиллар борлигини таъкидлади, аммо унинг президент этиб сайланиши суд таъқибини имконсиз қилганини билдирди.