Renault компанияси вакиллари Ўзбекистонда автомобиллар ишлаб чиқаришни йўлга қўйишга қизиқиш билдиришмоқда.
Мазкур масала корпорацияси раҳбарияти билан Ўзбекистоннинг Франциядаги элчихонасида бўлиб ўтган учрашувда муҳокама қилинди.
Renault, хусусан, машҳур KWID моделини ишлаб чиқариш, ўз навбатида Марказий Осиё мамлакатлари ва Афғонистонга маҳсулотлари экспортини йўлга қўйишга тайёр.
Автоконцерн мутасаддилари биринчи босқичда “А” класс автомобилларини йиғиш, келгусида эса бошқа сегментларга ўтиш ҳамда ишлаб чиқаришни маҳаллийлаштириб боришга тайёрлигини тасдиқлашди.
Таъкидланганидек, компания мамлакатимизга Марказий Осиёдаги узоқ муддатли шерик сифатида қарамоқда ва шунинг учун ҳам қўшма лойиҳаларга алоҳида аҳамият бериляпти.
Бинобарин, француз делегацияси ушбу имкониятни ўрганиш мақсадида яқин вақт ичида Ўзбекистонга ташриф буюради.
Renault вакиллари, шунингдек, 2018 йилда Ўзбекистонда ўзларига тегишли бўлган Lada русумидаги 6000 та автомобиль сотилганига урғу беришди. Бу эса маҳаллий бозор имкониятлари кенг ва ўзбекистонлик истеъмолчиларнинг қизиқиши катта эканлигидан дарак беради.
Маълумот учун, Renault Group (Renault, Dacia, Alpine, Renault Samsung Motors, Lada брендлари) — Франциянинг йирик автомобилсозлик корпорацияси бўлиб, унга 1898 йилда асос солинган. Компаниянинг 134 давлатда ваколатхонаси, 39 та заводи бор. Ўтган йилда мазкур бренд 3,9 млн. та автоулов сотган ҳамда 57 млрд. евродан ортиқ даромад кўрган.
