Қўшма Штатлар Полшадаги НАТО омборига танклар ва зирҳли машиналарнинг биринчи партиясини юборди

28 июнь, жума куни 14 та М1 Abram танки ва битта М88 зирҳли автомобили Повидзедаги базага темир йўл орқали жўнатилди. Бу ҳақда Stars and Stripes газетаси АҚШ армиясига таяниб хабар берди.

Баёнотда, армиянинг 405-дала қўллаб-қувватлаш бригадаси томонидан бошқариладиган Повидзе иншоотининг «30 йилдан ортиқ вақт ичида НАТО томонидан ташкил этилган энг муҳим объектлардан бири бўлиши» таъкидланди.

Келгуси йилда у тўлиқ ишга тушади ва Украина чегарасидан тахминан 400 километр узоқликдаги объектда жами 85 та танк, 190 та зирҳли техника, 35 та артиллерия ва турли ўқ-дорилар сақланади.

Бригада қўмондони полковник Эрнест Лейн IIнинг айтишича, объект НАТОнинг оператив имкониятларини кучайтиради. «Унинг стратегик жойлашуви бизга бир нечта транспорт имкониятларини, шунингдек, этказиб бериш бўйича турли хил имтиёзларни беради», дея қўшимча қилди у.