Қатар муносабатлари ёмонлашган Венесуэла ва АҚШга воситачилик қилмоқчи

Агар Вашингтон манфаатдор бўлса, Қатар АҚШ ва Венесуэла ўртасидаги инқирозни ҳал қилишда воситачи бўлиши мумкин.

Бу ҳақда Қатар бош вазири ва ташқи ишлар вазири Муҳаммад бин Абдулраҳмон Ол Тани Нью-Йоркдаги Халқаро алоқалар кенгашида сўзлаган нутқида маълум қилди.

Унинг сўзларига кўра, Доҳа ҳозирча бу йўналишда аниқ қадамлар қўйгани йўқ.

"Венесуэладаги саъй-ҳаракатларимизга келсак, биз буни АҚШнинг собиқ президенти Жо Байден президентлиги даврида, икки ҳукумат ўзаро ҳамкорлик қила бошлаганида бошладик. Бу ўзаро алоқа ватанига қайтган бир неча америкалик фуқароларнинг озод қилинишига олиб келди. Энди АҚШ президенти Дональд Трамп келиши билан биз улар билан алоқани тикладик. Агар АҚШ ҳали ҳам манфаатдор бўлса, биз бу жараённи ташкил этишга ёки жиддий ёрдам беришга тайёрмиз", деди у.

The New York Times (NYT) аввалроқ Қатар Вашингтон ва Каракас ўртасидаги инқирозни ҳал қилишда воситачилик қилмоқчи эканлигини хабар қилган эди. Газетанинг манбаларига кўра, Венесуела расмийлари Қатарнинг саъй-ҳаракатларини қўллаб-қувватлайди, аммо АҚШ маъмуриятини дипломатиядан кўра кўпроқ ҳарбий воситалар қизиқтиради.