Путин ёрдамчиси: "АҚШнинг баъзи таклифлари Россия учун мақбул, бошқалари эса йўқ"

Россия президенти Владимир Путин, АҚШ президенти элчиси Стив Уиткофф ва Оқ уй раҳбарининг куёви Жаред Кушнер ўртасида Москвада бўлиб ўтган учрашувда Украинадаги тинчлик режасининг бир неча вариантлари муҳокама қилинди.

Бу ҳақда журналистларга Россия президенти ёрдамчиси Юрий Ушаков маълум қилди.

Унинг сўзларига кўра, ҳозирча муросага келиш режаси йўқ; Американинг баъзи таклифлари Россия учун мақбул, бошқалари эса йўқ.

"Суҳбат жуда фойдали, конструктив ва жуда мазмунли бўлди", деди Россия президенти ёрдамчиси.

Унинг таъкидлашича, учрашувда асосий эътибор ҳудудий масала бўйича бўлган: “Биз аниқ матн ёки Американинг ўзига хос таклифларини муҳокама қилганимиз йўқ, балки бу ҳужжатларда нима борлигининг моҳиятини муҳокама қилдик”.

Ушаков томонлар Украинадаги вазиятни тинч йўл билан ҳал қилиш учун ҳамкорликни давом эттиришга тайёр эканликларини таъкидлади.