Путин мураккаб вазиятда қолган

Россия Украинадаги уруш тугашидан олдин Европадаги бирор давлатга ҳужум қилиши мумкин, чунки Путин мураккаб вазиятда қолган — Зеленский.

Украина президенти бундай фикрни The Guardian нашрига берган интервюсида билдирди.

Володимир Зеленскийнинг интервюсидан асосий иқтибослар:

◾️ Полша устида, шунингдек, Брюссел, Копенгаген ва Мюнхен аэропортлари яқинида пайдо бўлган дронлар Украинадаги фронтда сезиларли илгарилай олмаётган Россиянинг бошқа ҳудудларга кўз тикаётганини белгисидир;

◾️ Путин аввало Украинани босиб олмоқчи, кейин эса бошқа жойга юриши мумкин, деган фикрни — унутишимиз керак. У буларнинг иккаласини ҳам бир пайтда қилиши мумкин;

◾️ Россия дронлари ва қирувчи самолётларининг NATO'га аъзо Шарқий Европа давлатлари — Полша, Руминия, Эстония чегараларини бузган ҳолатлар Россиянинг Украинадаги фронтда сезиларли натижага эриша олмаганлиги билан боғлиқ;

◾️ Россия аллақачон “Европага қарши гибрид уруш” олиб бормоқда ва NATO'нинг “қизил чизиқларини” синовдан ўтказмоқда;

◾️ Украина АҚШдаги ишлаб чиқарувчилардан 27 та Patriot комплексига буюртма беришни режалаштирмоқда. Унгача Европадаги давлатлар ўзларида мавжуд Patriot тизимларини Киевга вақтинча бериб туриши мумкин;

◾️ Украинани Россиянинг дронлар ҳужумларидан ҳимоя қилиш мақсадида халқаро ҳамкорлар билан ишлаяпмиз. Аммо ҳозирча Буюк Британия ва бошқа иттифоқчилар Киевнинг узоқ вақтдан бери киритаётган сўровига қарамай, мамлакатнинг марказий ва ғарбий қисми устида ҳаво патрули учун ўз ҳарбий самолётларини юборишдан бош тортмоқда;

◾️ ЕИ ва Буюк Британиянинг ёрдами етарли эмас. Уруш тугаганда ва Путин тўхташга мажбур бўлганини тушунганда ёрдам етарли бўлади;

◾️ Биз иттифоқчиларимиздан кўп нарсаларни сўраганмиз, шу жумладан, қурол-яроғлар берилишини, ЕИ ҳамда NATO'га аъзо бўлишни;

◾️ Украина ҳудудида қўшин жойлаштириш ҳақидаги қарорни айни давлатларнинг ўзи қабул қилиши лозим;

◾️ Ҳаддан ташқари босим ўтказсак, Киев ҳамкорларининг молиявий ва ҳарбий ёрдамини йўқотиш хавфига дуч келиши мумкин.