Президент Эрдўған Трампнинг режасида имконият кўрди

Туркия президенти Режеп Таййип Эрдўған АҚШнинг Украина бўйича 28 банддан иборат тинчлик режаси томонлар манфаатларини инобатга олса, музокаралар учун асос бўлиши мумкинлигини билдирди. Туркия раҳбари бу ҳақда Йоҳаннесбургда ўтган «Йигирма гуруҳи» саммитида иштирок этиб қайтганидан сўнг гапирди.

«Бу режа бўйича келишув мумкинми? Ҳа, мумкин. Лекин қандай қилиб? Шу масалага эътибор қаратиш керак», — деди Эрдўған журналистларга. У келишув фақатgina режа томонларнинг «қонуний умид ва хавфсизлик эҳтиёжларини янги беқарорлик омилларини келтириб чиқармасдан» таъминлаганда амалий тус олишини таъкидлади.

Эрдўған Туркия Украинада тинчликка замин яратиш учун анча вақтдан бери ҳаракат қилиб келаётганини ва бу масалани АҚШ президенти Дональд Трамп билан бир неча бор муҳокама қилганини қайд этди. «Биз адолатли тинчликнинг ютқузувчилари бўлмайди, деб ҳисоблаймиз. Ва адолатли тинчликка эришиш йўли музокаралардан, томонлар учрашувларидан ўтишини аниқ деб биламиз», — деди Туркия президенти.

Туркия раҳбари томонлар келишиши мумкин бўлган масалалардан бошлаб музокараларни йўлга қўйиш ва ижобий кун тартибини шакллантиришга чақирди. «Биз томонлар ягона фикрга эга бўлган масалалардан бошланадиган музокаралар орқали келишувга эришиш мумкин, деб ҳисоблаймиз», — деди у.

«Ҳамманинг кўнглидан чиқадиган асос яратилса, узоқ муддатли ечим учун эшик очилади. Адолатли ва барқарор тинчликка йўл очадиган таклифлар бўйича музокараларнинг бошланиши жараёнга ижобий таъсир кўрсатади», — дея қўшимча қилди Эрдоган.

Туркия президенти Анқаранинг тинчлик жараёнида конструктив роль ўйнашга тайёрлигини таъкидлади. «Қандaй қилиб Туркия аввал Истанбулда муҳим роль ўйнаган бўлса, ҳозир ҳам худди шундай конструктив позицияни давом эттиришга тайёрмиз», — деди у.

Американинг режаси Украина Қуролли Кучлари сонини 600 минг нафарга чеклашни, мамлакатнинг нейтрал мақомини Конституцияда мустаҳкамлашни ва НАТОга аъзо бўлишдан воз кечишни назарда тутади. Режада, шунингдек, Қрим, Донецк ва Луганскнинг де-факто Россия ҳудуди сифатида тан олиниши, Херсон ва Запорожега эса тўқнашув чизиғи бўйлаб «музлатилган мақом» берилиши кўзда тутилган. Киев бу шартларни қабул қилинмас ва мамлакат суверенитетига таҳдид, деб ҳисоблайди.