Politico: АҚШ махфий ҳужжатлар ошкор қилинганидан кейин иттифоқчиларни тинчлантиришга ҳаракат қилмоқда
Пентагоннинг махфий ҳужжатлари кенг миқёсда ошкор этилишидан сўнг, АҚШнинг юқори мартабали амалдорлари саросимага тушган иттифоқчиларни - Европадан тортиб, Яқин Шарқ ва Киевгача бўлган давлатларни тинчлантиришга ҳаракат қилмоқда, деб ёзади Politico.
Ўтган ҳафта фош бўлганидан сўнг, АҚШ разведкаси, Давлат департаменти ва Пентагоннинг юқори мартабали мулозимлари разведка маълумотлари ҳақидаги хавотирларни йўқотиш учун бошқа мамлакатлардаги ҳамкасблари билан боғланишди, деди нашрга турли мамлакатлардан тўрт нафар расмий.
Лондон, Брюссел, Берлин, Дубай ва Киев расмийлари Вашингтонга махфий маълумотларнинг интернетда қандай пайдо бўлганлиги, сизиб чиқиши учун ким масъул эканлиги ва маълумотларнинг ижтимоий тармоқлардан олиб ташланиши учун АҚШ нима қилаётгани ҳақида саволлар бера бошлади.
Улар, шунингдек, Оқ уй келгусида разведка маълумотлари тарқалишини чеклаш чораларини кўряптими ёки йўқлиги билан қизиқмоқда.
Маълумотларнинг ошкор этилиши АҚШнинг иттифоқчилар билан муносабатларида инқирозга олиб келди ва Вашингтон вазиятни қандай тузатиши ҳали аниқ эмас, кўпчилик буни WikiLeaks веб-сайтида махфий ҳужжатлар эълон қилинганидан бери Америка разведкасининг энг катта муваффақиятсизликларидан бири деб атайди.
«Унинг ошкор этилиши ва ҳужжатларнинг мазмуни жуда ғайриоддий», деди Россияни ёритган АҚШ разведкасининг собиқ таҳлилчиси Politicoга.
