Politico: АҚШ Ғазони Фаластин назоратига ўтказиш режаси устида ишламоқда

АҚШ президенти Жо Байден маъмурияти вакиллари октябр ойи ўрталаридан бери Ғазо секторини можародан кейин бошқариш бўйича кўп босқичли режани ишлаб чиқмоқда. Politico газетаси америкалик икки амалдорга таяниб хабар беришича, у анклавдаги вазиятни барқарорлаштириш учун халқаро кучлардан вақтинча фойдаланилгандан сўнг минтақани Фаластин ҳукумати назоратига ўтказишни назарда тутади.

Газетанинг суҳбатдошларига кўра, Давлат департаменти, Оқ уй ва бошқа идоралар расмийлари бир неча ҳафта давомида кўплаб дастурий ҳужжатлар ва идоралараро йиғилишларда Ғазонинг бўлажак тузилишига оид таклифларни муҳокама қилишган. Умумий концепция “Исроил қўшинлари ва [Фаластин ҳаракати] ХАМАС жангарилари ўртасидаги шиддатли жанглар тугаганидан кейин Ғазони кўп босқичли реконструкция қилиш”га асосланади. Америкалик стратегларнинг фикрича, “минтақадаги вазиятни яқин келажакда барқарорлаштириш учун халқаро кучлар керак бўлади ва узоқ муддатда ҳокимият модернизация қилинган Фаластин маъмуриятига ўтади”.

Бу ечим идеал эмас, лекин у ҳаётий ва Исроил операцияси тугаганидан кейин Ғазони бошқариш учун энг яхши вариант бўлиб кўринади, дейди расмийлар. Бу "Қўшма Штатларни Исроил ҳукумати билан қарама-қаршилик йўлига солиб қўйиши" мумкин, бу аввалроқ бундай сценарий қабул қилиб бўлмайдиганлигини аниқ кўрсатган эди, дея таъкидлади газета. Шу билан бирга, Политиcо суҳбатдошлари Америка томонининг режалари ривожланишнинг дастлабки босқичида эканлигини ва уларнинг амалга оширилиши "кўплаб олдиндан айтиб бўлмайдиган ўзгарувчиларга боғлиқ"лигини таъкидладилар. АҚШ расмийлари Фаластин анклавидаги шиддатли жанглар "камида яна бир неча ҳафта давом этишини" кутмоқда, дея қўшимча қилди нашр.