Тошкентнинг “Пахтакор” клуби уй учрашувлари ўтказиб келинадиган “Пахтакор” марказий стадиони бузилиб, ўрнига янги стадион қурилиши ҳақида хабар берган эдик.
Айни пайтда стадионнинг янги кўриниши қандай бўлиши аниқланмоқда, тақдим қилинган лойиҳалар орасидан бирини танлаб олиш жараёни кетяпти.
Клуб сайтида эълон қилинган тендердан сўнг 20га яқин компаниялар бу борада ўз таклифларини билдиришган. Қайд этилишича, стадион ФИФАнинг охирги талабларига жавоб берадиган ҳолатда бунёд этилиши сабабли сўнгги қарорга келишдан аввал барчасини пухта ўйлаб кўриш талаб этилади.
Маъқул деб топилган лойиҳа танлангач, стадион пойтахтимиз марказида жойлашиши ва унинг кўркига айланиши мақсадида ҳукуматнинг тегишли идоралари билан биргаликда қурилиш ишлари қачон бошланиши борасида тўхтамга келинади.
Клуб айни ҳолатда эса стадионни бузиш ишлари қачон бошланиши аниқ эмаслигини билдирган. Лойиҳа масаласи аниқ бўлиши билан бу ҳақида маълумот расмий сайтимизда тақдим этилади.
