Панама президентининг жавоби узоқ кутилмади

Панама канали Панама назорати остида қолишини мамлакат президенти Хосе Раул Мулино таъкидлади.

"Панама халқи номидан мен АҚШ президенти Доналд Трампнинг тантанали нутқидаги Панама канали ҳақидаги фикрларини тўлиқ ва қатъий рад этишим лозим. Яна бир бор такрорлайман: канал Панама ва унинг бошқаруви назорати остида бўлиб қолади," - дея душанба куни Панама президенти девонхонаси томонидан эълон қилинган баёнотда айтилган.

"Дунёдаги бирор мамлакатнинг раҳбарияти бизнинг бошқарувимиз ишига аралашмайди. Канал ҳеч кимнинг ижарасида бўлмаган. Кураш 1999 йилда якунланди ва кейинги 25 йил давомида биз каналга узлуксиз раҳбарлик қилиб, уни савдо ва бутун дунё, шу жумладан АҚШ манфаати йўлида ривожлантириб келдик," - деди Мулино.

У мулоқот учун ҳар доим имконият борлигини, бироқ Панама каналининг суверенитетива мулкчилик ҳуқуқи Панамада қолишини таъкидлади.

Душанба куни ўтказилган инаугурация маросимидаги нутқида Трамп Панама ҳукумати Панама каналини бошқариш бўйича ўз мажбуриятларини бажармаётганини ва АҚШ ушбу канал устидан назоратни қайта ўрнатишини маълум қилган эди.