Олимлар қон гуруҳи ва эрта инсулт хавфи ўртасидаги боғлиқликни аниқлади

Мериленд университети олимлари иккинчи қон гуруҳига (А) эга одамларда 60 ёшга қадар инсултни бошдан кечириш хавфи юқори эканини аниқлади. Бу ҳақда ScienceAlert хабар бермоқда.

Ушбу соҳадаги тадқиқотлар 2022 йилда бошланган. Ўшанда олимлар А1 кичик гуруҳи ва ёшроқ одамларда инсулт хавфининг юқори бўлиши ўртасидаги боғлиқликни аниқлаганди.

Олимлар 17 минг инсултга чалинган бемор ва тахминан 600 минг соғлом инсонларни қамраб олган 48 та генетик тадқиқот натижаларини таҳлил қилди. Тадқиқот иштирокчиларининг ёши 18 ёшдан 59 ёшгача бўлган.

Сўнгги тадқиқотлар шуни кўрсатдики, иккинчи қон гуруҳидаги одамларда инсулт эҳтимоли бошқа қон гуруҳлари эгаларига қараганда 16 фоизга юқори. Аксинча, биринчи қон гуруҳига эга бўлган одамларда хавф 12 фоизга паст бўлган.

Шу билан бирга, катта ёшдаги иккинчи қон гуруҳли одамларда инсулт хавфи сезиларли эмаслиги аниқланди. Бу эса ёшларда касалликнинг ривожланиш механизмлари бошқачароқ бўлиши мумкинлигини англатади.

Тадқиқот раҳбари Стивен Киттнернинг таъкидлашича, хавфнинг аниқ сабаблари ҳали номаълум. Унинг тахминича, бу қон ивишининг ўзига хос хусусиятлари, тромбоцитлар ёки тромблар ҳосил бўлишида иштирок этувчи оқсиллар билан боғлиқ бўлиши мумкин. Аниқ маълумотларни олиш учун қўшимча тадқиқотлар талаб этилади.