Нью-Йоркда Николас Мадуро ва унинг рафиқасига қарши иккинчи суд мажлиси бўлиб ўтди

Нью-Йоркда Николас Мадуро ва унинг рафиқасига қарши иккинчи суд мажлиси бўлиб ўтди — CNN.

Суд мажлиси давомида прокурорлар Мадуро ва унинг турмуш ўртоғини “Венесуэла бойликларини талон-торож қилишда” айблаб, суддан уларнинг суд харажатларини давлат ҳисобидан қоплашга рухсат бермасликни сўраган. Ҳимоя томони эса собиқ президент ва унинг рафиқаси адвокат хизматларини ўзлари тўлай олмаслигини, АҚШ эса бу орқали уларнинг ҳуқуқларини бузаётганини таъкидлаган.

Ишни кўраётган федерал судя Элвин Хеллерштейн бу масала бўйича тез орада қарор чиқаришини айтган, аммо фақат тўлов муаммоси сабаб ишни тўхтатмаслигини ҳам билдирган. Судда Мадуро АҚШ ҳукумати уни “наркотерроризм” бўйича айбловлардан ҳимояланишига тўсқинлик қилаётганини айтиб, ишни ёпишни сўраган.

Жорий йилнинг 3 январ куни Венесуэла президенти Николас Мадуро Каракасда америкалик махсус кучлар томонидан қўлга олинди ва АҚШга олиб кетилди. Шундан сўнг, президент вазифасини илгари вице-президент лавозимида ишлаган Делси Родригес муваққат президент сифатида фаолият юритмоқда ва Вашингтон билан алоқалар бир оз илиқлашди.

Мадуро тўртта оғир жиноятда айбланмоқда. АҚШ қонунчилигига кўра, наркотерроризм террорчиликни молиялаштириш мақсадида наркотрафик билан шуғулланишни англатади. Мадуро барча айбловларни рад этиб, буни АҚШнинг Венесуэладаги бой нефт захираларини эгаллашга бўлган уриниши ва сиёсий баҳонаси деб атамоқда.