Германияда жамоатчилик фикри Исроилга нисбатан кескин ўзгарди: янги сўровнома натижаларига кўра, немисларнинг 57% энди бу давлатга манфий муносабатда. Бу кўрсаткич Исроилнинг Ғазодаги ҳарбий ҳаракатларидан сўнг кескин ошган. Ушбу сўров жума куни Frankfurter Allgemeine Zeitung газетаси учун Алленсбах институти томонидан эълон қилинди.
2022 йилда фақат 23% немислар Исроилга нисбатан салбий фикр билдирган бўлса, бугунги кунга келиб уларнинг сони деярли икки баробарга ошган.
Сўровда қатнашганларнинг 73% Исроилнинг Ғазода амалга ошираётган ҳаракатларини «геноцид» деб аташда ҳақлик борлигини таъкидлаган. Фақат 9%гина бу таърифни мутлақо инкор этган.
Исроилнинг ҳарбий ҳужумлари бўйича хавотир ошиб бораётгани ҳам сўров натижасида аниқ бўлди: немисларнинг 65% Ғазодаги ҳаракатларни «ноўрин» деб баҳолаган. Фақат 13%гина ҳарбий кампанияни қўллаб-қувватлаган.
Нацизм тарихи билан боғлиқ равишда Германия Исроилга «алоҳида масъулият»га эгами, деган саволга респондентларнинг 28%и «ҳа» деб жавоб берган бўлса, 52% бу фикрни рад этган.
Шунингдек, 37% немислар Исроилни бутун дунё учун жиддий таҳдид деб ҳисоблашини билдирган. Бу кўрсаткич 2021 йил январида 11% бўлган эди.
Германия жамиятидаги кайфият ўзгариши Исроилнинг Ғазодаги ҳарбий ҳаракатлари ортидан кучайган халқаро танқидлар фонида содир бўлмоқда. Алленсбах сўрови 2025 йил 1–12 июн кунлари ўтказилган бўлиб, у Исроилнинг Эрондаги ядровий ва ҳарбий объектларга берган ҳужумидан олдин ўтказилган.
Исроил Эрон билан уруш тугаганини расман эълон қилди
Эрон бутун Исроил бўйлаб зарбалар берди — Ислом инқилоби қўриқчилари корпуси
Эрон Исроилни мағлубиятга учратганини маълум қилди
