НАТО саммитининг биринчи куни ҳақида

Вашингтонда бўлиб ўтаётган НАТО саммити Жо Байден муваффақиятcиз дебатдан сўнг тарафдорларини етакчилик қила олишига ишонтириши учун яхши имконият яратади. 81 ёшли Байден охирги кунларда президентлик пойгасини давом эттиришини қайта-қайта, жиддий таъкидламоқда.

Ўтган ҳафта “ABC News” телеканалига берган интервюсида Байден Трампни мағлуб этишини, унинг ваколати даврида НАТО кенгайганини маълум қилган.

Анжуманда Украина келажаги масаласи кўриб чиқилади. НАТО раҳбари Йенс Столтенберг иттифоқчилардан Украинага муҳим ёрдам ажратиш зарурлиги ва бу Киевнинг альянсга аъзо бўлиши учун кўприк вазифасини ўташи мумкинлигини айтган. Унинг фикрича, Украинани ташкилотга қўшиш масаласини муҳокама қилишга ҳали эрта. Шунингдек, Бош котиб АҚШда ноябр сайловида ким ғалаба қилишидан қатъи назар, Вашингтон иттифоқнинг тамал тоши бўлиб қолаверади.

Британиянинг янги Бош вазири айтишича, Украина Россияга зарба бериш учун Буюк Британия ракетасидан фойдаланиши мумкин.

– Ушбу кўмак мудофаа мақсадини кўзлайди, аммо қуролни қандай жойлаштиришни Украина ҳал қилиши керак.

Оқ уй маълумот беришича, тўртта “Патриот” аккумулятори ва бутловчи қисм, шунингдек SAMP-T тизими Киевга жўнатилади. Яқин келажакда ҳаво ҳужумидан мудофаа учун ўнлаб тактик, жумладан NASAMS, HAWK, IRIS T-SLM, IRIS T-SLS ва Гепард тизими етказиб бериш ниятида. Қўшма Штатлар келаси йил Украина Қуролли кучларига юзлаб тутувчи ракета топшириш ваъдасини берди.

“Иттифоқчилар коалицияси Украина ҳаво мудофаасини кучайтириш учун 1 миллиард доллардан ортиқ маблағ ажратишга келишиб олди”, дейилган Оқ уй баёнотида.

АҚШ Давлат котиби Энтони Блинкен айтишича, иттифоқчилар Украинага ҳарбий самолёт юбора бошлаган. Дания ва Нидерландия ҳам ушбу турдаги қуролларни Украинага жўнатди.