НАТО: Россия сентябрь ойида 50 мингдан ортиқ ҳарбий хизматчисини йўқотган

NATO вакилининг Bloomberg нашрига берган маълумотига кўра, Россия армияси 2026 йил сентябрь ойида 50 мингдан ортиқ ҳарбий хизматчисини йўқотган. Уларнинг 28 минг нафаргачаси ҳалок бўлган бўлиши мумкин. Альянс вакили сентябрь ойини Россия қўшинлари учун йил бошидан буён энг катта йўқотишлар кузатилган давр сифатида баҳолаган.

Манбага кўра, шу даврда Украина армиясининг ҳалок бўлган ва яраланган ҳарбийлари сони тахминан 5 минг кишини ташкил этган. Бу Россия қўшинларининг йўқотишлари Украина томониникидан қарийб 10 баравар кўп бўлиши мумкинлигини англатади.

Украина Бош штаби эса сентябрь ойида Россия 46 230 нафар ҳарбий хизматчисини йўқотганини билдирган. Бироқ ушбу рақамда ҳалок бўлганлар сони алоҳида кўрсатилмаган. Украина томонининг ҳисоб-китобларига кўра, Россия армиясининг ойлик йўқотишлари январдаги 31 710 кишидан сентябрда 46 230 кишигача ошган.

Украина маълумотларига кўра, Россия 2022 йил февралида бошланган кенг кўламли босқиндан буён жами қарийб 1,55 миллион ҳарбий хизматчисини йўқотган. Бу кўрсаткич ҳалок бўлганлар, яраланганлар, бедарак йўқолганлар ва асирга тушганларни қамраб олади.