НАТО Россия бўйича янги стратегия тайёрламоқда

Шимолий Атлантика альянси Россияга нисбатан янги стратегияни муҳокама қила бошлади. НАТО давлатлари мудофаа вазирлари бу масалани келаси ҳафтада биринчи марта муҳокама қилади, деб ёзади Politico.

Нашр Россия ва НАТО ўртасидаги муносабатлар Москванинг Грузия ва Украинага тажовузи фонида сезиларли даражада ёмонлашганини эслатади. Аммо шунга қарамай, альянс 1997 йилда имзоланган Россия Федерацияси билан ўзаро муносабатлар, ҳамкорлик ва хавфсизлик тўғрисидаги асосий ҳужжатга амал қилишда давом этмоқда. Унда НАТО ва Россия "барқарор, тинч ва бўлинмаган Европани қуриш" умумий мақсадини тан олади.

Шу билан бирга, Россия-НАТО кенгаши 2022 йилдан бери ўтказилмаган. Бундай орган совуқ урушдан кейин хавфсизлик масалалари бўйича ҳамкорлик ва қўшма лойиҳалар учун ташкил этилган.

"Ҳозир НАТО стратегиянинг турли элементларини аниқлашга (Россия бўйича - таҳр.) ва альянс ичидаги мунозараларни илгари суришга ҳаракат қилмоқда, бу бизни Россия-НАТО асосий ҳужжатининг келажаги каби масалаларга олиб келади," - дея АҚШ ҳукуматининг юқори мартабали вакили баёнотидан иқтибос келтиради нашр.

Унинг аниқлик киритишича, ҳозир "альянс бўйича иттифоқчиларнинг аниқ позицияларини ҳисобга оладиган янги стратегияни ишлаб чиқиш вақти келди." Унинг лойиҳаси ҳозирча йўқ.

Масъулнинг сўзларига кўра, асосий ҳужжат ва Россия-НАТО кенгаши НАТО ва Россия муносабатларида "бошқа давр учун яратилган".

Нашрнинг аниқлик киритишича, янги стратегия бўйича мунозаралар бир неча ойдан бери давом этмоқда. Аммо келгуси ҳафтада бу мавзу биринчи марта НАТОга аъзо мамлакатлар мудофаа вазирлари даражасида муҳокама қилинади. Келишувларга кўра, бундай стратегия 2025 йил июнь ойида Гаагада бўлиб ўтадиган альянснинг навбатдаги саммити олдидан ишлаб чиқилиши керак.