НАТО «Россия билан урушга тайёрланмоқда»

Россия Федерацияси ташқи ишлар вазири ўринбосари Александр Грушко НАТО «Россия билан урушга тайёрланмоқда» деган фикрни айтди.

Унинг сўзларига кўра, Москва мудофаа соҳасида режалаштиришда альянс билан эҳтимолий ҳарбий тўқнашувни ҳисобга олган. «НАТО Россия билан қуролли тўқнашувга тайёрланмоқда. Бизнинг ҳарбий хавфсизликни мустаҳкамлаш бўйича таклифларимиз АҚШ ва унинг иттифоқчилари томонидан рад этилди. НАТОнинг тажовузкор хатти-ҳаракатлари ва у билан боғлиқ Россия хавфсизлигига тўғридан-тўғри таҳдидлар бизнинг ҳарбий қурилишимизда ва мудофаа соҳасидаги режалаштириш жараёнида ҳисобга олинади,» - деди Александр Грушко.

Россия ТИВ раҳбари ўринбосари ўз сўзларини НАТО ҳарбий контингенти сонини кўпайтираётгани ва Россия чегаралари яқинида машғулотлар ўтказаётгани билан изоҳлади. Унинг фикрича, иттифоқ мамлакатлари совуқ уруш даврида қўлланилган мудофаа режаларига кўп жиҳатдан ўхшаш мудофаа режаларини қабул қилган.

Грушконинг сўзларига кўра, Россия тўғридан-тўғри тўқнашувга йўл қўймаслик, шу жумладан ҳарбий имкониятларини намойиш этиш йўлидан бормоқда.