Шимолий Атлантика алянси ташқи ишлар вазирлари 3 апрел куни Брюсселда ташкилотнинг 75 йиллигига бағишланган икки кунлик учрашувга йиғилди ва Вашингтондаги юбилей саммитга тайёргарликни муҳокама қилди.
Учрашувда музокараларнинг асосий мавзуси Украинага Россияга қарши туришидаги ёрдам бўлди. НАТО бош котиби Йенс Столтенберг айтганидек, вазирлар келгуси йилларда Украинага барқарор ва тахмин қилинадиган ҳарбий ёрдам учун беш йилга 100 миллиард евролик бюджет билан махсус фонд яратиш ҳақида гаплашди.
"Биз Украинага узоқ муддатда ишончли ва тахмин қилинадиган ёрдам кўрсатишимиз керак. Ихтиёрий бадалларга камроқ ва кўпроқ НАТО мажбуриятларига, қисқа муддатли таклифларга камроқ ва кўп йиллик истиқболларга кўпроқ таянишимиз керак", —дея таъкидлади Столтенберг журналистларга.
Якуний матбуот анжуманида Столтенберг Украинага 100 миллиард евро миқдорида ёрдам фондини яратиш бўйича якуний қарор қабул қилинмаганини айтди. Шу билан бирга, бош котиб: "Биз консенсус томон кетмоқдамиз ва якуний қарор июл ойида Вашингтонда бўлиб ўтадиган НАТО саммити давомида қабул қилинади", — дея маълум қилди.