Моуриньо «Реал»да жазонинг янги усулини жорий қилди

Жозе Моуринью «Реал»га қайтиши билан жамоада интизом борасида янги тартиб ўрнатди. Энди машғулотга кеч қолган футболчилар пул билан эмас, ўйин амалиётидан маҳрум бўлиш орқали жазоланиши мумкин.

The Sun нашри Defensa Central’га таяниб хабар беришича, португалиялик мураббий интизом бузилиши учун пул жарималаридан воз кечган. Машғулотга кечиккан футболчи умумий гуруҳдан четлатилиб, тренажёр залида якка тартибда ишлаши мумкин. Бундан ташқари, у кейинги ўйин қайдномасига ҳам киритилмаслиги эҳтимолдан холи эмас.

AS нашри ҳам Моуринью келганидан кейин «Реал»да қоидалар анча қаттиқлашганини ёзган. Янги тартибга кўра, футболчилар машғулот бошланишидан камида бир соат олдин Вальдебебасдаги базага етиб келиши шарт. Кечиккан ўйинчи жамоа билан эмас, алоҳида шуғулланади.

Моуринью штаби тикланиш жараёни ва овқатланиш масаласини ҳам қаттиқ назоратга олган. Жароҳатдан кейинги реабилитация клуб базасида ўтиши керак. Ҳатто футболчи шахсий мутахассис билан ишласа ҳам, бу жараён клуб назоратида бўлади. Жамоа рациони ҳам «Реал» мутахассислари тавсиялари асосида шакллантирилмоқда.

Моуринью 2026 йил ёзида «Реал»га қайтди. Мадрид клуби 11 июнь куни 63 ёшли мутахассис тайинланганини расман эълон қилди. Унинг шартномаси 2029 йил 30 июнга қадар мўлжалланган.

Португалиялик мураббий бунга қадар 2010–2013 йилларда ҳам «Реал»ни бошқарган. Унинг қўл остида мадридликлар 2011/12 йилги мавсумда 100 очко жамғариб, Испания чемпиони бўлган эди.