Месси ёки Роналду? Асрнинг энг буюк футболчиси ким бўлади?

АҚШда ўтаётган Жаҳон чемпионати сўнгги 20 йилликдаги жаҳон футболининг энг буюк рақобатларидан бири — Лионель Месси ва Криштиану Роналду ўртасидаги баҳсга яна бир муҳим саҳифа қўшмоқда. Футбол тарихида бутун бир даврни белгилаб берган икки афсона энди замонамизнинг энг буюк футболчиси мақоми учун сўнгги ва ҳал қилувчи курашни олиб бормоқда.

Месси ва Роналду футбол тарихидаги энг кўп соврин ютган футболчилардан ҳисобланади. Улар фаолияти давомида қарийб 2000 та гол урган ва клуб ҳамда миллий жамоалар сафида жами 85 та совринни қўлга киритган.

Бироқ қайси бири буюкроқ деган саволга аниқ жавоб йўқ. Агар мезон голлар сони ва Чемпионлар лигасидаги натижалар бўлса, устунлик Роналду томонида. Агар «Олтин тўп»лар сони ва халқаро мусобақалардаги ютуқларга қаралса, Месси олдинда.

Бир неча йил аввал Португалия билан Европа чемпионлигини қўлга киритган Роналду рақобатда олдинга чиққандай кўринган эди. Аммо кейинчалик Месси Аргентина терма жамоаси билан икки марта Америка кубогини ва Жаҳон чемпионлигини қўлга киритиб, вазиятни ўзгартирди.

Месси ва Роналду ҳақида китоб ёзган муаллифлардан бири Жошуа Робинсоннинг таъкидлашича, Мессида Роналдуда йўқ энг муҳим ютуқ — Жаҳон чемпионлиги бор.

Жорий Жаҳон чемпионати 41 ёшли Роналду учун ушбу бўшлиқни тўлдиришдаги сўнгги имконият бўлиши мумкин. 39 ёшли Месси эса кетма-кет иккинчи Жаҳон чемпионлигини қўлга киритиб, фаолиятига муносиб нуқта қўйишни мақсад қилган.

Бу чемпионат ҳар икки футболчи учун олтинчи Жаҳон чемпионати ҳисобланади. Футбол тарихида жуда кам сонли ўйинчилар миллий жамоаси сафида шунча вақт юқори даражада иштирок этган. Шу жиҳатдан улар Мексика терма жамоаси дарвозабони Гильермо Очоа билан бир қаторда туришади.

Месси ва Роналду ўртасидаги рақобат нафақат бир авлод, балки бутун футбол тарихининг энг ёрқин саҳифаларидан бири бўлиб қолади. Ким буюкроқ экани ҳақидаги баҳслар эса улар майдонни тарк этганидан кейин ҳам узоқ йиллар давом этиши шубҳасиз.