Мерц Украинага янги ҳарбий ёрдам эълон қилди

Германия канцлери Фридрих Мерц бугун эрталаб олдиндан эълон қилинмаган ташриф билан махсус поездда Киевга борди. У билан бирга иқтисодиёт вазири Катерина Райхе ва мудофаа ҳамда энергетика соҳаларининг 10 нафар вакили ҳам Украина пойтахтига келган.

Мерц Киевда Германиянинг Украинага кенг кўламли ҳарбий ёрдамини давом эттиришини маълум қилиши кутилмоқда. Германия ҳукумати маълумотига кўра, Берлин Россиянинг реактив двигателли зарбадор дронларига қарши курашиш учун Украинага минглаб дрон-тутқичлар етказиб беришга тайёргарлик кўрмоқда.

Шунингдек, Германия узоқ масофага зарба берувчи қуролларни биргаликда ишлаб чиқаришни тезлаштирмоқчи. Бунинг учун аввал тасдиқланган бюджет маблағларидан 1 миллиард евро ажратилиши режалаштирилган. Яна 350 миллион евро вайрон бўлган электр станцияларини таъмирлаш ва тиклашга йўналтирилади.

Мерцнинг ташрифи Россиянинг Украинага, жумладан Киевга ҳужумлари кучайган бир пайтга тўғри келди. У Киевга келишидан бироз олдин Россия Ташқи ишлар вазирлиги хорижий дипломатлар ва меҳмонларни Украина пойтахтига бориш хавфли эканидан огоҳлантириб, шаҳарни тарк этишга чақирди.