Мерц Трамп билан телефон суҳбатини "отмен" қилди

Германия канцлери Фридрих Мерц ва АҚШ президенти Дональд Трамп 8 сентябрь куни телефон орқали суҳбатлашиши режалаштирилган эди. Бироқ суҳбат кутилмаганда бошқа, ҳозирча аниқ белгиланмаган санага қолдирилди. Бунга расмий сабаб ҳали маълум қилинмаган.

Германия ҳукумати матбуот котиби Штефан Корнелиус эса масала оддий жадваллар мос келмагани билан боғлиқ эмаслигига ишора қилди.

BILD таҳририяти суҳбатнинг қолдирилишига Оқ уйнинг Германиядаги минтақавий сайловларда «Германия учун альтернатива» (AfD) партиясининг муваффақиятига муносабати сабаб бўлган бўлиши мумкинлигини тахмин қилмоқда.

Трамп Мерцнинг сиёсий рақиби бўлган AfD партиясининг сайловдаги натижасини олқишлади. АҚШ президенти Truth Social тармоғида: «Вау, Германияда популистик партия учун ҳақиқатан ҳам катта кеча бўлди», — деб ёзди.

Трамп шунингдек, ўзининг машҳур «Make America Great Again» шиорига ўхшатиб, «MGGA!!!» қисқартмасини қўшди. Бу «Make Germany Great Again» — «Германияни яна буюк қиламиз» маъносини англатиши мумкин. Трамп AfDни бевосита тилга олмаган, аммо «Улар юксалишда», деб ёзган.

Суҳбатнинг қолдирилиши Трампнинг ушбу пости билан боғлиқми, деган саволга Корнелиус изоҳ беришни истамади. У фақат Мерц аввал ҳам бир неча бор аниқ билдирган позициясига ишора қилди. Канцлер «абстракт шаклда» Германиядаги ички сиёсий вазиятга, айниқса сайловлар билан боғлиқ ҳолатларга аралашиш ёки улар ҳақида изоҳ беришни «қабул қилиб бўлмайди», деб таъкидлаган.

СДПГ АҚШ президентининг баёнотига муносабат билдиришни талаб қилди

Мерцга қўшимча босимни Социал-демократик партия (СДПГ) ҳам ўтказмоқда. Партиянинг Бундестагдаги фракцияси бошқарувчиси Дирк Визе федерал ҳукуматдан Трампнинг баёнотларига аниқ муносабат билдиришни талаб қилди.

«Бу масалада очиқ-ойдин гаплашиш керак. Бундай аралашувга йўл қўйиб бўлмайди. Менимча, биз [...] бунга кўз юма олмаймиз», — деди Визе.

Визе ҳатто қиёсий мисол келтирди: агар Германия ҳукумати АҚШда губернаторлик сайловида демократ номзоднинг ғалабасини олқишлаганида нима бўлар эди?

«Менимча, ўшанда Truth Social АҚШ президентининг реакцияси сабаб титраб кетган бўларди», — деди у.

Мерц ва Трампнинг телефон суҳбати аслида бошқа мавзуга — 2001 йил 11 сентябрдаги террорчилик ҳужумларининг 25 йиллигига бағишланиши керак эди.