Махфий вазифа. Британияликлар Украинадаги урушга қандай таъсир ўтказди

Британиянинг The Times газетаси Буюк Британиянинг Украинадаги урушга чуқур ва кўп қиррали аралашуви ҳақида кенг қамровли мақола эълон қилди. Хусусан, нашр 2023 йилда кескинлашган келишмовчиликлар шароитида Лондоннинг Киев ва Вашингтон ўртасидаги муносабатларда воситачилик роли ҳақида хабар беради.

Украина Қуролли Кучлари қарши ҳужумининг март ойидан май-июнь ойларига кўчирилган бошланиш пайтига қадар, Буюк Британия аллақачон Украинага ўз ҳарбий мураббийларини юборган эди. Улар украиналик жангчиларга узоқ масофали Storm Shadow ракеталари ва NLAW танкка қарши тизимларидан фойдаланишни ўргатишган. The Times маълумотларига кўра, ҳужумни режалаштириш билан Британиянинг юқори мартабали генераллари Роли Уокер ва Чарли Стикленд шуғулланган, разведка ёрдамини эса ҳарбий разведканинг собиқ раҳбари Жим Хокенхолл кўрсатган.

Бироқ, газета таъкидлаганидек, Украина янги техника етказиб берилишини кутиб, ҳужумни бошлашни кечиктиришга қарор қилди. Шу пайтда Британия: "Ҳозир бошлаш керак, Россия унчалик кучли эмас, сизда етарли қурол-аслаҳа бор" деб қаттиқ туриб олди. Киев эса, ўз навбатида, кутиш ҳолатини танлаб, Россия армиясига ўз позицияларини мустаҳкамлашга имкон берди.

Ҳужум тактикаси бўйича ҳам жиддий келишмовчиликлар келиб чиқди. Америкаликлар ва британияликлар бир йўналишда зарба беришни маслаҳат беришди, аммо Украина Қуролли Кучлари бош қўмондони Александр Сирский кучларни бўлиб, Донбасс ва жанубга бир вақтнинг ўзида ҳужум қилишни талаб қилди. Бу АҚШнинг норозилигига сабаб бўлди, улар УҚКнинг ҳаракатлари жуда секин ва самарасиз деб ҳисоблади. Ўша пайтда Киев ва Вашингтон ўртасидаги муносабатлар инқирозга юз тутди.

The Times газетасининг ёзишича, британияликлар норасмий воситачиларга айланиб, вазиятни юмшатишга кўмаклашмоқда. АҚШдан фарқли ўлароқ, Лондон вакиллари Украинага тез-тез, баъзан норасмий тарзда ташриф буюришган - масалан, генерал Уокер бир сафар фуқаролик кийимида келгани учун "пушти шимли генерал" лақабини олган.

Вазият 2023 йил август ойида британиялик адмирал Тони Радакин, Валерий Залужний ва АҚШнинг Европадаги қўшинлари бош қўмондони Кристофер Каволи ўртасидаги учрашувдан сўнг юмшади. Ўшанда томонлар нафақат жорий кампания, балки келгуси ойлар учун ҳам режаларни келишиб олишди. Газетанинг маълум қилишича, Радакин кенгайтирилган вазифани ўз зиммасига олди ва Британиянинг Украинага ҳукумат даражасидаги ёрдамининг асосий мувофиқлаштирувчисига айланди.

The Times, шунингдек, 2024 йил август ойида Украина маълумотлар сизиб чиқишидан хавотирланиб, АҚШ ва иттифоқчиларни огоҳлантирмасдан Курск вилоятида ҳужум бошлаганини хабар қилади - худди шундай ҳолат 2023 йил баҳорида Запороже ҳужумидан олдин ҳам юз берган эди.

Британия манбалари таъкидлашича, Украина "даҳшатли тўлов тўлаган", бироқ шу билан бирга "Ғарбга келажак уруши ҳақида бетакрор тасаввур берган". Олинган жанг тажрибаси аллақачон НАТО қўшинларининг юқори шиддатли можароларга тайёрлигини баҳолашда қўлланилмоқда.