Мадуро: "Венесуэла 100 йил ичида энг жиддий таҳдидга дуч келди"

Венесуэла президенти Николас Мадуро республика сўнгги 100 йил ичида АҚШ томонидан босқиннинг энг катта таҳдидига дуч келаётганини айтди.

Бу ҳақда у матбуот анжуманида маълум қилди.

"Венесуэла сўнгги 100 йилда қитъамиз дуч келган энг катта хавф билан юзма-юз турибди. 1200 та ракетага эга саккизта ҳарбий кема ва битта атом сув ости кемаси мамлакатимизга қаратилган", - деди Мадуро.

У босқинчилик таҳдидини "ҳаддан ташқари, асоссиз ва мутлақо жиноий" деб таърифлаган. Президент “максимал ҳарбий босим шароитида Венесуэла мудофаа учун тўлиқ тайёрлигини эълон қилганини” таъкидлади.

Президент АҚШ Давлат котиби Марко Рубиони Венесуэлага босим ўтказишда ва Лотин Америкасидаги вазиятни беқарорлаштиришда айблади. Венесуэла раҳбари Рубио Венесуэла, Жанубий Америка ва Кариб ҳавзаси аҳолисига қарши уруш бошлаш ниятида эканини айтди.

19 август куни Reuters агентлиги Пентагондаги манбаларига таяниб, АҚШ ҳарбий-денгиз кучларининг учта эсминеци (USS Gravely, USS Jason Dunham ва USS Sampson) "наркокартелларга қарши кураш бўйича операцияларни ўтказиш учун" Кариб денгизининг жанубий қисмига Венесуэла қирғоқларига юборилгани ҳақида хабар берди. Шунингдек, USS Newport News атом сувости кемаси, USS Lake Erie бошқариладиган ракета крейсери, десант кемалари ва 4500 нафар ҳарбий хизматчи сафарбар этилгани хабар қилинган.