«London Chess Classic». Нодирбек Абдусатторов кетма-кет 3 та ғалабадан кейин якка пешқадамга айланди

Англиядаги «London Chess Classic» турнирида кеча 4-тур ўйинлари ўтказилди. Унда иштирок этаётган ўзбекистонлик гроссмейстер Нодирбек Абдусатторов илк турда дуранг ўйнаб, иккинчи турда ғалаба қозонгани ҳақида маълумот бериб ўтгандик.

Ҳамюртимиз учинчи ва тўртинчи турларни қора доналарда ўтказди. Шунга қарамай, у мезбонларнинг икки аъзосини мағлуб этди. Дастлаб Никита Витюгов таслим этилган бўлса, кеча эса Майкл Адамс 31 юришда мағлуб этилди.

Нодирбек 3,5 очко билан якка пешқадам бўлиб турибди. Иккинчи ўриндаги Алиризо Фирузжа ҳисобида 3,0 очко мавжуд. 2,5 очко билан кучли учликка кирган Николас Теодору (Греция) бугун Абдусатторовга рақиблик қилади. Ўйин Тошкент вақти билан 21:00 да старт олади.