Либерияда маймун чечаги билан касалланганлар сони 78 тага етди

Ғарбий Африкадаги Либерия Республикасида йил бошидан буён маймунчечак (mpox) вирусини юқтириш билан боғлиқ 78 та ҳолат қайд этилди, деб хабар беради Anadolu.

Миллий соғлиқни сақлаш институти (NPHIL) раҳбари Дугбе Крис Ньяннинг сўзларига кўра, мамлакатда хавфли вирусни юқтиришнинг яна тўртта янги ҳолати аниқланган.

Вирус тарқалишининг олдини олиш чора-тадбирлари доирасида Либерия ўтган ой Европа Комиссиясининг Соғлиқни сақлаш бўйича фавқулодда вазиятлар бўлимидан mpox вирусига қарши 10,8 минг доза вакцина олган.

Ҳайвонлар ва одамлар орқали юқади

Маймун чечаги каламуш каби кемирувчилардан, шунингдек, ушбу вирус билан касалланган одамлардан юқади.

Биринчи аломатлар одатда инфекциядан кейин 5-21 кун ичида пайдо бўлади. Буларга юқори иситма, бош оғриғи, бел ва мушак оғриғи, кенгайган лимфа тугунлари, заифлик, титроқ ва тери тошмаси киради.

Mpox вируси учун махсус даволаш мавжуд эмас. Даволаш антивирал препаратлар билан амалга оширилади. Кўпгина беморлар енгил касалликка дуч келишади ва бир неча ҳафта ичида тузалиб кетадилар.