Латвия мудофаа вазири Андрис Спрудс истеъфога чиқди

Латвия ҳудудига Россия томондан иккита дрон учиб кирганидан сўнг бу қарор қабул қилинган бўлиши мумкин.

"Латвия армиясини сиёсий кампанияга тортилишидан ҳимоя қилиш учун мудофаа вазири лавозимидан кетишга қарор қилдим", — деди Спрудс.

Вазирнинг қўшимча қилишича, сўнгги ҳафталарда Латвия дронлар иштирокидаги жиддий ҳодисаларга дуч келган. У бегона дронлар аҳоли хавфсизлигига таҳдид солмаслиги кераклигини таъкидлаб, мудофаа соҳаси мамлакат ҳаво ҳудудини ҳимоя қилиш ва фуқароларнинг хавфсизлик ҳиссини таъминлаш учун кўп ишлар қилганини ва буни давом эттиришини билдирди.

Андрис Спрудс амалга оширилган ишларга ишончи қолмагани учун эмас, балки қуролли кучлар ва давлатнинг мудофаа қобилияти ҳар қандай вазирлик лавозими ва ҳар қандай партия манфаатларидан устун бўлгани учун кетаётганини маълум қилди.

Латвия бош вазири Эвика Силиня Спрудс унинг ва жамоатчиликнинг ишончини йўқотганини ёзди. "Мен унинг истеъфосини талаб қилишга қарор қилдим. Келгусида мудофаа соҳасига профессионал мутахассис раҳбарлик қилиши керак", — деди бош вазир.

Аввалроқ, Латвияда Россиядан учиб ўтган иккита дрон қулаб тушгани, улардан бири нефт омборига зарар етказгани маълум бўлганди.