Lacetti, Damas, Labo ва Cobalt нархлари оширилди

UzAuto Motors компанияси оммабоп автомобиллар бўлган Lacetti, Damas, Labo ва Cobalt нархларини оширгани маълум бўлди. Бироқ компания бу ҳақида расмий маълумот бермаган.

UzAuto Motors компанияси оммабоп автомобиллар нархларини оширгани маълум бўлди.

Компания сайтидаги маълумотларга кўра, сотувда мавжуд бўлмаган Lacetti, Damas, Labo ва Cobalt моделлари нархлари қимматлашган. Бироқ компания бу ҳақида расмий маълумот бермаган.

Комплектацияларнинг нархлари қуйидагича оширилган:

• Lacetti L-Style Plus AT — 160 млн 868 минг сўмдан 169 млн 118 минг сўмга;
• Damas D2 DLX Style Plus — 92 млн 204 минг сўмдан 96 млн 932 минг сўмга;
• Labo LB2 Plus: 91 млн 669 минг сўмдан 96 млн 370 минг сўмга;
• Cobalt GS-Style Plus MT — 113 млн 711 минг сўмдан 119 млн 542 минг сўмга;
• Cobalt GX-Style Plus AT — 134 млн 294 минг сўмдан 141 млн 181 минг сўмга.

Собиқ депутат Расул Кушербаев ушбу ўзгаришни навбатдаги аҳмоқлик деб атади.

«Ҳукуматнинг халқдан яширган ёпиқ қарорлари асосида катта имтиёзларга эга зараркунанда, монополист нимаики аҳмоқлик бўлса қилмоқда. Фақат бу ишлар халқ эмас, халқнинг қийналиши ҳисобига яшайдиган, бир гуруҳ шахсларнинг фойдасига», — деб ёзди у.

Аввалроқ компания келаси йилгача оммабоп автомобиллар учун янги шартномалар тузмаслиги ва нархлар яна ошиши кутилаётгани ҳақидаги хабарларни рад этганди.

Эслатиб ўтамиз, 4 август куни соат 17:30 да компания автомобиллар учун шартномалар чиқариш қайта тиклангани ва янги конфигурациялар жорий этилганини, 5 август куни соат 15:57 да эса 2023 йил учун қўшимча партияга тўлиқ шартнома тузилганини маълум қилганди.

Орадан вақт ўтиб, UzAuto Motors йил охиригача 50 мингдан ортиқ автомобиль эгаларига топширилишини маълум қилганди. 2024 йилдан эса автомобиллар шартнома тузилган кундан бошлаб уч ой ичида етказиб берилиши ваъда қилган.