КХДРдан яна бир гуруҳ ҳарбий хизматчилар Россияга боради

Шимолий Корея қўшинларининг иккинчи гуруҳи тез орада Россияга жўнаб кетади, деб ёзади Bloomberg Сеул шу ҳафта бошида ўз иттифоқчилари билан баҳам кўрган Жанубий Корея разведкаси ҳужжатларига таяниб.

Ушбу ҳужжатларга кўра, 1500 нафар элита махсус кучларининг биринчи гуруҳи аллақачон 10 000 га яқин Шимолий Корея аскарларини режалаштирилган жойлаштириш доирасида Россиянинг Узоқ Шарқида тайёргарликдан ўтмоқда.

Унда, шунингдек, Россиянинг Украинага қарши ҳарбий ҳаракатларини қўллаб-қувватлаш учун КХДРдан қурол-яроғ етказиб бериш тафсилотлари ҳам баён этилган.

Сеул маълумотларига кўра, ўтган йилнинг август ойидан бери Пхенян 8 миллионга яқин 122 ва 152 миллиметрли снарядлар, шунингдек, ракеталар ва танкга қарши қуролларни юборган.

Bloomberg манбаларига кўра, Жанубий Корея душанба куни НАТО расмийларига разведка маълумотларининг бир қисмини тақдим этади.

Альянснинг жавоб вариантлари чекланган, дейди агентлик суҳбатдошлари, лекин Киевни қўллаб-қувватлашни кучайтириш ва Ҳинд-Тинч океани минтақасида ҳамкорликни ривожлантиришни ўз ичига олиши мумкин.

Украина разведкаси маълумотларига кўра, Россияда КХДРнинг 12 минг ҳарбий хизматчиси бор, уларнинг бир қисми шарқий полигонларда тайёргарликдан ўтиб, аллақачон Курск вилоятига йўл олган.

Украина президенти Владимир Зеленский жума куни разведка маълумотларига таяниб, Шимолий Корея қўшинлари шу дам олиш кунларида фронтга бориши мумкинлигини айтди.