"Курдистон ишчилар партияси” қуролларини топширди

Халқаро майдонда террорчи, деб тан олинган Курдистон ишчилар партияси Ироқ шимолидаги Сулаймония вилоятида қуролларини рамзий топшириш маросимини ўтказди.

Anadolu нашрининг ёзишича, Сурдас тумани ҳудудидаги бир ғорда тўпланган гуруҳ аъзолари: 30 киши, жумладан 15 нафар аёл, ўз қуролларини катта алангага ташлаб, йўқ қилган.

Воқеа жойида курдларнинг юқори мартабали аъзоси турк ва курд тилида баёнот ўқиб эшиттирди. Жараёнга гувоҳ бўлиш учун Туркиянинг Миллий разведка ташкилоти, ироқлик расмийлар ва хавфсизлик кучлари келган.

Жорий йил май ойида “Курдистон ишчилар партияси” (КИП) ўзини тарқатиб юбориш ва қуролни ташлаш қарорини эълон қилган эди. Бу баёнотга — феврал ойида партия етакчиси Абдуллоҳ Ўжаланнинг қамоқдан туриб КИП ва унга алоқадор гуруҳларни тарқатиб юбориш, 40 йилдан ортиқ давом этган қуролли курашга барҳам беришга чақирган мурожаати туртки бўлган эди.

Мақсадларини Туркиядаги курдларнинг миллий ҳуқуқлари учун кураш ва курд давлатини барпо этиш деб эълон қилган “Курдистон ишчилар партияси” 1974 йил ноябрда ташкил топган. 1984 йилдан бери Туркия ҳукуматига қарши қуролли кураш олиб бораётган эди.

Туркияга қарши 40 йиллик кураш давомида КИП Туркия, АҚШ ва Европа Иттифоқи томонидан террорчи ташкилот сифатида тан олинган. Оммавий ахборот воситаларига кўра, улар 40 мингдан ортиқ инсоннинг ўлимига сабаб бўлган.