Коррупцияга қарши кураш – тараққиёт ва адолат гарови

Аввал хабар берганимиздек, айни пайтда "Коррупцияга қарши курашиш"ойлиги доирасида партия ва Агентликнинг ҳудудий ва маҳаллий тузилмалари томонидан маҳалла фуқаролар йиғинлари фаоллари ҳамда аҳоли вакиллари иштирокида “Аҳолининг коррупцияга қарши курашишда фаоллигини ошириш – қонун устуворлиги гарови” мавзусида давра суҳбатлари ва учрашувлар ташкил этилмоқда.

Жумладан, “Адолат” СДП Тошкент шаҳар Кенгаши томонидан Олмазор туманидаги "Қичқириқ" маҳалласида бўлиб ўтган “Коррупцияга қарши жамоавий кураш – адолат кафолати” номли тадбирда “Адолат” СДП Сиёсий Кенгаши раиси Робахон Махмудова, партия Марказий аппарати фаоллари, партиянинг Тошкент шаҳар ва Олмазор туман Кенгашлари масъуллари, маҳаллий Кенгаш депутатлари, диний идора вакиллари, маҳалла аҳолиси ва ОАВ ходимлари иштирок этишди.

Давра суҳбатида сўзга чиққан партия етакчиси “Адолат” СДП нафақат апрель ойида, балки келгусида ҳам коррупцияга қарши курашда тизимли фаолиятни изчил давом эттириш мақсад қилинганига алоҳида тўхталди. Коррупцияга қарши муросасиз кураш олиб боришда нафақат давлат органлари, балки жамиятнинг ҳар бир аъзоси фаол иштирок этиши шартлигини таъкидлади.

– Ушбу эзгу мақсад йўлида бирлашсак, адолат қарор топишига, жамият тараққиёти ва тинч-осуда, фаровон ҳаётни таъминлашга муносиб ҳисса қўшамиз. “Адолат” СДП ҳамда Ўзбекистон Республикаси Коррупцияга қарши курашиш агентлигининг “Коррупцияга қарши курашиш ойлиги”да барчангизни фаол иштирок этишга чақираман. Зеро, коррупцияга қарши кураш — давлат ва жамият тараққиётининг муҳим омили. Шундай экан, мазкур иллатга муросасиз бўлиш ва коррупцияга қарши курашишда барчамиз бирдек масъулмиз!– деди Робахон Махмудова.

Тадбир иштирокчилари коррупциянинг ижтимоий-иқтисодий ҳаётга салбий таъсири, унинг ҳуқуқий ва мафкуравий муаммолари ҳамда бу иллатга қарши курашда жамоатчилик назоратининг ўрни ҳақида фикр алмашишди. Шунингдек, фуқароларнинг ҳуқуқий онгини ошириш, уларни қонун бузилишларига нисбатан муросасизлик руҳида тарбиялаш масалалари муҳокама қилинди.

– Партиянинг Тошкент шаҳар Кенгаши томонидан ойликнинг биринчи ҳафтаси давомида пойтахт маҳаллаларида давра суҳбатлари ва учрашувларни юқори савияда, турли соҳалар мутахассисларини жалб қилган ҳолда ўтказиш бўйича “йўл харитаси” ишлаб чиқилди, –
дейди “Адолат” СДП Тошкент шаҳар Кенгаши раиси Муҳаррам Дадаходжаева. – Мулоқотлар давомида фуқароларимизга кундалик ҳаёти давомида коррупциянинг у ёки бу кўринишлари, таъмагирлик ҳолатларига дуч келганда, қандай ҳуқуқий механизм ёки таъсир чораларини кўриши мумкинлиги ҳақида тушунчалар берилмоқда. Шаҳар Кенгаши таркибидаги маҳаллий кенгашлар томонидан бу борада ҳар бир туманда куннинг биринчи ва иккинчи қисмида иккитадан тадбир ва суҳбатлар ташкил этиляпти.

Суҳбатдан сўнг партия раҳбари "Қичқириқ" маҳалласида аҳоли фаровонлигини ошириш, тадбиркорликни ривожлантириш, хотин-қизлар ва ёшларнинг давлат ва жамият ҳаётидаги ижтимоий-сиёсий фаоллигини юксалтириш бўйича олиб борилаётган ишлар билан танишди. Маҳалла институтини ҳар томонлама қўллаб-қувватлаш ва мавжуд муаммо ва таклифларни ўрганган ҳолда ҳамкорликда ишлаш бўйича МФЙ вакиллари билан фикр алмашди.