Кейинги йил Ўзбекистон нуфузли чемпионатга мезбонлик қилиши мумкин

2024 йилда 18 ёшгача бўлган ўсмирлар ўртасида муз устида хоккей бўйича навбатдаги Осиё ва Океания чемпонатини Ўзбекистонда ўтказиш таклиф қилинди

Кеча Тошкентда Халқаро хоккей Федерацияси (IIHF) вице-Президенти Айваз Оморканов ва Ўзбекистон хоккей Федерацияси Президенти Бахтиёр Фазилов учрашувида ҳамкорликнинг истиқболлари муҳокама қилинди.

Учрашувда Осиё Олимпия Кенгаши (ООК) томонидан IIHF билан ҳамкорликда ташкил этилган хоккей бўйича ўқув-машғулотлар масаласи муҳокама қилинди. Маълумот учун, ўқув-машғулотда 30 дан ортиқ Осиё мамлакатларидан 100 дан ортиқ ёш хоккейчи иштирок этади.

Учрашув давомида Айваз Оморканов ушбу тадбирни ташкил этиш даражасини, Ўзбекистон хоккей Федерацияси томонидан хоккейни ривожлантириш бўйича амалга оширилаётган ишларни, шунингдек, Ҳумо аренасидаги замонавий хоккей инфратузилмасини ҳам юқори баҳолади.