АҚШ президенти Ғазо секторида Исроил ва ХАМАС ўртасидаги жангларда олти ҳафталик танаффусга чақирди. Байденнинг сўзларига кўра, бу узоқ муддатли тинчлик йўлидаги биринчи қадам бўлиши мумкин, деб хабар беради DW.
АҚШ президенти Жо Байден Исроил ва ХАМАС террорчилик ҳаракатини Ғазо секторидаги жангларда олти ҳафталик танаффус қилишга чақирди. Америка етакчисининг бу баёноти 12 февраль, душанба куни Вашингтонда Иордания қироли Абдуллоҳ II билан бўлиб ўтган музокараларидан сўнг айтилди.
Байденга кўра, Қўшма Штатлар устида ишлаётган Ғазо секторидаги олти ҳафталик сулҳ, бир томондан, исроиллик гаровга олинганларни озод қилишда ёрдам берса, иккинчи томондан, етказилаётган гуманитар ёрдам ҳажмини ошириши мумкин.
Абдуллоҳ II, ўз навбатида, Ғазо секторидаги урушни зудлик билан тўхтатишга чақирди.
"Биз бунинг давом этишига йўл қўя олмаймиз. Бизга ҳозир узоқ муддатли ўт очишни тўхтатиш керак. Уруш тугаши керак", – деди Иордания монархи. У жангларнинг давом этиши инсонпарварлик фалокатига таҳдид солаётганини қўшимча қилди. Абдуллоҳ II, шунингдек, икки Фаластин ҳудуди – Ғарбий Соҳил ва Ғазо секторининг сиёсий бўлинишини “қабул қилиб бўлмас”лигини айтди.