Жанубий кореялик аёл "Кальмар ўйини" сериали "қаҳрамони"нинг тузоғига илинди

Жанубий кореялик аёл 6 ой давомида «Кальмар ўйини» сериали юлдузи деб ўзини таништирган фирибгар билан сунъий интеллект ёрдамидаги “ишқий ёзишма” олиб борди — натижада 350 минг доллардан ортиқ пулни йўқотди.

Жанубий Кореялик ёлғиз аёлга ижтимоий тармоқларда ўзини «Ли Чжон Чжэ» — «Кальмар ўйини» сериали бош қаҳрамони сифатида таништирган шахс ёзган. У гўё мухлислар билан мулоқот қилмоқчи эканини айтган. Қиз унинг гапларига ишонган ва шундан сўнг уларнинг 6 ойлик ишқий ёзишмаси бошланган. Фирибгар унга ширин сўзлар ёзиб, сериалнинг учинчи мавсуми суратга олиш ишлари ҳақида “ёлғон” хабарлар берган ва актёрнинг сунъий интеллект орқали яратилган селфиларини юборган.

Ортидан «Ли Чжон Чжэ» гўё турли “шошилинч сабаблар” билан аёлдан пул сўрай бошлаган. Бир куни у чет эл аэропортида “қолиб кетгани”ни айтган ва ёрдам сўраган — аёл ишонган ва пул жўнатган. Кейин яна сўраганда ҳам жўнатган. Ҳатто “шахсий учрашув учун VIP рухсатнома” деб аталган билет учун 7,500 доллар тўлаган, аммо бундай учрашув ҳеч қачон бўлмаган.

Аёл ўзининг алданганини жуда кеч тушунган — у вақтга келиб 351 минг доллардан ортиқ маблағни йўқотган эди. У полицияга мурожаат қилди, аммо ҳуқуқ-тартибот органлари фирибгарни қўлга олиш қийин бўлишини, у чет элда ҳаракат қилаётганини таъкидламоқда. Шу воқеадан сўнг ҳақиқий актёрнинг агентлиги мухлисларга ҳеч қандай ҳолатда ўзини актёр деб таништирган шахсларга пул юбормасликни қатъий тавсия қилди.