Исроил яқин кунларда Ғазога "тўлиқ куч билан" ҳужум қилади - Нетаняху

Исроил Бош вазири Бинямин Нетаняху ўз идораси маълумотларига кўра, резервчиларга шундай деди:

“Яқин кунларда операцияни якунлаш учун бор кучимиз билан ҳаракат қиламиз”.

Исроил ҳаракатларидан мақсад радикал исломий террорчи ҲАМАС ташкилотини “мағлубиятга учратиш” ва “йўқ қилиш”дир. Нетаняху, шунингдек, унинг ҳукумати ҳозирда Ғазо секторидан фаластинликларни қабул қилишга тайёр давлатларни қидираётганини айтди. Исроил “Ғазо аҳолисига чиқиб кетишга рухсат берувчи” агентлик яратди. Бош вазирнинг тахминича, агар имконият бўлса, фаластинликларнинг "50 фоиздан ортиғи" Ғазо секторини тарк этади.

Аввалроқ Исроил Ғазо секторидаги ҳарбий амалиётини қисқа муддатга тўхтатган эди. Террорчилар асирлигидан гаровга олинган Эден Александрни озод қилиш ва уни Исроилга олиб боришда сулҳга риоя қилинди.