Исроил Нусейрат қирғинидан бир кун ўтиб Ғазодаги мактаб ва уйларни бомбардимон қилмоқда

Исроил сўнгги бир кун ичида Ғазо шаҳридаги иккита мактабга зарба бериб, тинч аҳолини нишонга олишда давом этар экан, камида 52 кишини ўлдирди.

Исроил Ғазо секторидаги уй-жой ва мактабларга ҳужумларини давом эттирмоқда. Нусайрат лагерига бўлган ҳужумда ўнлаб одамлар ҳалок бўлганидан бир кун ўтиб, яна бир неча киши ўлдирилди ва яраланди.

Фаластиннинг «Вафа» ахборот агентлиги хабарига кўра, шанба куни тонгда бўлиб ўтган ҳужумларда Саадаллаҳ оиласининг тўрт нафар аъзоси Жабалъиядаги уйида, Ғазо шаҳрининг шимоли-шарқидаги мактабда икки киши ва Хон Юнус жанубидаги чодирда паноҳ топган бир киши ўлдирилган.

Ўша куни кечқурун Ғазо шаҳри ғарбидаги Ал-Римал маҳалласидаги Ал-Мажида Васила мактабига берилган зарбада ҳарбийлар етти кишини ўлдирган, дея хабар беради «Вафа».

Шунингдек, ахборот агентлиги Ғазо шаҳрининг шимоли-ғарбида жойлашган Жалаа чорраҳасида тинч аҳоли гуруҳига қарши дрон ҳужуми амалга оширилгани, натижада бир аёл ҳалок бўлгани ва бир неча киши жароҳатланганини хабар қилди. Ал-Нусайрат лагери ғарбидаги ҳаво ҳужумида яна бир тинч фуқаро ҳалок бўлди.

Бундан ташқари, Рафаҳ шаҳрининг ғарбида жойлашган Ал-Мавоси ҳудудига уюштирилган дрон ҳужуми оқибатида яна беш фуқаро жароҳатланди.