Исроил мудофаа вазири Эронга ҳужум «ўлимга олиб келадиган, аниқ ва кутилмаган» бўлишини ваъда қилди

Исроил мудофаа вазири Йоав Галант Эронга ҳужум «ўлимга олиб келадиган, аниқ ва кутилмаган» бўлишини ваъда қилди.

ОАВ хабарларига кўра, Исроил хавфсизлик маҳкамаси бугун Эронга қарши эҳтимолий жавоб зарбасини муҳокама қилади. Учрашувни бош вазир Бенямин Нетаняху режалаштирган, деб ёзади Axios. Журналистларга кўра, ҳукумат раҳбари Теҳронга ҳарбий жавоб чоралари бўйича аниқ қарорлар қабул қилиш учун хавфсизлик кабинетининг розилигини талаб қилади.

Эрон ўтган ҳафтада Исроилга 200 га яқин ракета учирди, бироқ ҳужум жиддий зарар келтирмади. Бундан ташқари, Теҳрон ҳукумати Ливандаги Ҳизбуллоҳ террор ташкилоти ва Исроилга мунтазам ҳужум қиладиган яманлик ҳусийларни фаол қўллаб-қувватлайди.

«Исроил давлатига зарар етказмоқчи бўлган ҳар бир киши тўловни тўлайди. Эронга ҳужумимиз ҳалокатли, аниқ ва кутилмаган бўлади», деди Исроил мудофаа вазири Йоав Галант.

Бир кун аввал Нетаняху икки ой ичида биринчи марта АҚШ президенти Жо Байден билан телефон орқали гаплашди. Кўринишидан, суҳбат Исроилнинг Эронга жавоб зарбасига бағишланган.