Исроил Бош вазири яна бир бор ҳарбий кампанияни “тўлиқ ғалаба” билан якунлашга қатъий бел боғлаганини тасдиқлади

Исроил Бош вазири яна бир бор ҳарбий кампанияни “тўлиқ ғалаба” билан якунлашга қатъий бел боғлаганини тасдиқлади. У, шунингдек, можарони тугатиш учун, унинг фикрича, зарур бўлган шартларни санаб ўтди: гаровга олинганларни озод қилиш ва Ғазо секторини ҳарбий қуроллардан халос этиш.

Шунга қарамай, Ғазода очарчилик хавфи кучайгани сабабли, Нетаняҳу якшанба куни кечқурун 11 ҳафтадан бери давом этаётган блокадани юмшатишини эълон қилди. Бироқ, эртаси куни БМТ фақатгина ёрдам ортилган бир неча юк машинасига сектор ҳудудига киришга рухсат берилганини маълум қилди.

Исроилнинг иттифоқчилари бу чораларни “ниҳоятда етарли эмас” деб баҳолаб, халқаро гуманитар стандартларга мос тўлиқ ёрдам етказиш тизимини тиклашга чақирди.

Шу билан бирга, блокадага киритилган ҳатто энг кичик енгиллик ҳам ҳукуматдаги ўта ўнг қанот вакиллари томонидан танқидга учради. Нетаняҳу эса ижтимоий тармоқларда блокада юмшатилганини яқин иттифоқчиларининг босими остида амалга оширганини тан олди, бироқ уларнинг номларини ошкор этмади. Унинг айтишича, “Исроилнинг дўсти бўлган сенаторлар” агар очликдан азият чекаётган фаластинликлар акс этган кадрлар тарқала берадиган бўлса, мамлакатни қўллаб-қувватлашни давом эттира олмасликларини билдирган.

Нетаняҳу гуманитар вазиятнинг кескинлашуви назоратни йўқотишга олиб келиши мумкинлигини таъкидлади, бироқ бу билан айнан нимани назарда тутганини очиқламади.

Европа Иттифоқининг Исроил билан савдо битимини қайта кўриб чиқиш ҳақидаги қарорига Исроил Ташқи ишлар вазирлиги ҳам муносабат билдирди: расмий вакил Орен Морморштейн бу позицияни “Исроил дуч келаётган мураккаб ҳақиқатни бутунлай нотўғри тушуниш” деб атади.

Бундан ташқари, Исроилда Оқ уй сиёсатига нисбатан хавотир кучаймоқда. Исроилга умумий қўллаб-қувватлов бўлишига қарамай, Доналд Трамп бошчилигидаги АҚШ маъмурияти ундан тобора узоқлашмоқда. Аввалроқ ТRТ хабарида ёзилишича, АҚШ президенти Яқин Шарқ бўйлаб сўнгги сафарида Тел-Авивга бормаган. Сафар доирасида Трамп америкалик гаровдагилардан охиргисини озод этиш бўйича ҲАМАС билан алоҳида келишувга эришган, бу билан Исроил ҳукуматини четлаб ўтган. Бундан ташқари, у Ғазада “очликдан азият чекаётган кўплаб одамлар борлигини” тан олиб, уларга ёрдам ваъда қилган.

Узоқ йиллар АҚШнинг қўлловига таянган Исроил учун бу ҳолат, Ғазо босиб олинган ҳолда қолаётган бир пайтда, халқаро миқёсда тобора кучайиб бораётган яккаланишни англатади.

Ғазо ҳарбий босиб олиниши бошланганидан бери 53 мингдан ортиқ одам ҳалок бўлди, уларнинг аксарияти тинч аҳоли вакиллари. Халқаро ташкилотлар огоҳлантирмоқда: минтақа очлик ёқасида турибди. Халқаро босим кучайиб бораётганига қарамай, Исроил ҳануз сулҳга ёки музокараларга тайёрлигини кўрсатмаяпти. Ҳарбий ҳаракатлар кенгаймоқда, гуманитар фалокат эса кескин кучаймоқда.