Исроил БМТнинг Фаластинлик қочқинлар бўйича агентлиги UNRWAнинг Шарқий Қуддусдаги биноларини бузиб ташлади

Бу ҳақда Reuters хабар берди.

Хабар берилишича, Исроил кучлари булдозерлар ёрдамида БМТ агентлигига тегишли бир нечта йирик бино ҳамда бошқа кичик иншоотларни вайрон қилган. UNRWA мазкур мажмуадан сўнгги бир йил давомида фойдаланилмаганига қарамай, Исроилнинг бу ҳаракатини кескин қоралади.

Агентлик раҳбари Филиппи Лаззарини Исроилнинг бу ҳаракатини қоралаб, уни “халқаро ҳуқуққа очиқ ва қасддан бўйсунмасликнинг янги даражаси” деб атади. Унинг сўзларига кўра, бу Исроил томонидан UNRWA'га қарши амалга оширилаётган кетма-кет чораларининг навбатдагиси ҳисобланади. Жумладан, шу ой бошида агентликнинг тиббий клиникасида рейд ўтказилган, шунингдек, яқин ҳафталарда UNRWA иншоотларини электр энергияси ва ичимлик суви таъминотидан узиш режалаштирилган.

Исроил парламенти 2024 йил октябр ойида UNRWA'нинг мамлакат ҳудудидаги фаолиятини тақиқловчи ҳамда расмий шахсларга агентлик билан ҳамкорлик қилишни ман этувчи қонунни қабул қилган. Исроил расмийлари агентликнинг айрим ходимлари ҲАМАС гуруҳи аъзолари бўлганини ва 2023 йил 7 октябрда Исроилга қилинган ҳужумда иштирок этганини даъво қилмоқда.