Исроил армияси Наблус шаҳрида рейд ўтказди

Наблус шаҳрида Исроил армияси томонидан навбатдаги йирик рейд ўтказилди.

AFP агентлиги хабарига кўра, 27 август куни тонг соат 03:00 ларда бошланган операцияда ўнлаб аскар ва зирҳли техника иштирок этган. Гувоҳлар ҳарбийлар уйларга кириб тинтув ўтказганини, айрим уйлар эса ҳарбий постларга айлантирилганини маълум қилди.

Наблус губернатори Ғассан Даглас бу ҳужумни "асоссиз куч ишлатиш" деб баҳолади.

Фаластин Қизил Ярим Ой жамияти маълумотича, тўқнашувларда бир нечта фуқаро жароҳат олган, ўлим ҳолати қайд этилмаган.

Эски Наблус шаҳри аввал ҳам Исроил армияси рейдлари ва қуролли тўқнашувлар саҳнасига айланган. 2025 йил июнь ойидаги сўнгги рейдда икки нафар фаластинлик ҳалок бўлган эди.