Испания 3-дивизионининг 29-туридан ўрин олган “Кордоба” ва “Феррол” жамоалари ўртасидаги баҳсда мезбонлар футболчиси майдонда ҳушини йўқотди.
Учрашувнинг 11-дақиқасида “Кордоба” ҳимоячиси Драгиша Гудел ҳушини йўқотди ва майдонга қулади. Шифокорлар майдонга чиқиб келиб, ўша ернинг ўзида Гуделга тиббий ёрдам кўрсатди. Кейинчалик маълум бўлишича, Драгишанинг юраги уришдан тўхтаган ва уни ҳаётини сақлаб қолиш учун икки марта дефибриллятор ишлатилган.
Шифокорлар Гуделни замбилга ётқизиб олиб кетаётганда, футболчи ўйинни давом эттириш истагини билдирган. Бироқ, унга рухсат берилмаган. Учрашув эса давом эттирилмади.
Ҳозирда 25 ёшли футболчининг аҳволи яхшиланган.
