Испанияда ўрмон ёнғинлари авж олмоқда

Испаниянинг турли минтақаларидаги ўрмон ёнғинлари 6 мингга яқин одамни эвакуация қилишга мажбур қилди.

Бу ҳақда Европа ОАВлари хабар бермоқда.

Кастилия-Леон автоном ҳамжамиятида деярли 4000, Андалусияда мингга яқин одам эвакуация қилинган.

Испания Мудофаа вазирлиги ғайритабиий иссиқлик шароитида тез тарқалаётган ёнғинларга қарши курашиш учун мингга яқин аскар юборилгани ҳақида хабар берди.

Сешанбага ўтар кечаси ўт ўчирувчилар Мадрид яқинида ёнғин тарқалишини тўхтатишга муваффақ бўлишди. Бу вақтга келиб ёнғин Трес-Кантос муниципалитетида аллақачон 1000 гектарга яқин майдонни йўқ қилган ва бир киши ҳалок бўлган.