Испания уч кунлик мотам эълон қилди

Испания Бош вазири Педро Санчес Адамус шаҳрида камида 39 кишининг ҳаётига зомин бўлган поезд тўқнашуви ортидан уч кунлик миллий мотам эълон қилди.

EFE маълумотларига кўра, фожиа жойига ташриф буюрганида, Бош вазир авария сабаблари "мутлақ шаффофлик ва аниқлик билан" текширилишига ишонтирди.

"Биз ҳақиқатни билиб оламиз, жавобни билиб оламиз", деб тасдиқлади Бош вазир.

Санчес шунингдек, қурбонларнинг оилаларига барча зарур ёрдам кўрсатилишига ваъда берди.

Испаниянинг Адамус шаҳрида Малагадан Мадридга 300 йўловчини олиб кетаётган Iryo поездининг бир нечта вагонлари рельсдан чиқиб, қарама-қарши йўналишда ҳаракатланаётган ва бортида 184 йўловчи бўлган Alvia поезди билан тўқнашди. Фалокатда 39 киши ҳалок бўлди.