Ислом Исмоилов: "Бизга оғир таъсир қилди, сабаби..."

Суперлиганинг 4-турида ҳам “Нефтчи” ғолибона юришини давом эттиряпти. Бу сафар Фарғонада “Локомотив”га қарши бўлиб ўтган баҳсда майдон эгалари 3:1 ҳисобида ғалаба қозонишди. Ўйиндан кейин “Нефтчи” устози Ислом Исмоилов матбуот анжуманида иштирок этди.

- Рамазон ҳайит байрами билан ва Наврўз байрами билан ҳам табриклайман. Ўйин юқори шиддатда ўтди, бу олдиндан маълум эди. Одатда жамоа қандайдир совринни қўлга киритганидан кейинги учрашув жуда оғир бўлади. Энг қийин нарса – бу эмоциялардан кейин тикланиши. Бу учрашувда ушбу ҳолат ўз сўзини айтди. Жамоа оғир ўйин ўтказди. Бироқ “Локомотив”ни ҳам алоҳида эътироф этиш керак. Клуб бежизга юқори ўринларда кетмаяпти. Ажойиб ўйин ўтказишди. Беллашув стадионга келган мухлисларга манзур бўлди, деб ўйлайман. Шу билан бирга стадионда бизни қўллаган барча ишқибозларимизга миннатдорчилигимни билдираман.

- 4 та ўйинда 1 та гол ўтказиб юборилди. Кам гол ўтказиш – бу тактика билан боғлиқми ёки дарвозабонлар зўр ишлаяптими?

- Иккаласига ҳам боғлиқ. Ўтказилган битта гол ҳам пенальтидан бўлди, ўйин ҳолатидан эмас. Бизга оғир таъсир қилди. Сабаби, бу нарсани узоқроққа олиб бормоқчи эдик. Бу қачондир бўлиши керак эди, бугун содир бўлди. Мақсадимиз, ҳимоямизни рақиб дарвозаси олдида қуриш. Кўпроқ прессинг ва кўпроқ олдинда ҳаракатланганимизнинг ҳисобига дарвозамиз олдида хавф камроқ бўляпти. Ҳа, ҳимоячилар ҳам юқори савияда ҳаракат қилишяпти. Айниқса, жамоа сардори ва унинг ёнидаги футболчилар аъло даражада ҳаракат қилишяпти. Жамоа ҳимояда ҳам зичликни ҳосил қила оляпти. Шунинг учун олдинда кўпроқ голлар уряпмиз ва ҳимояда камроқ ўтказяпмиз.

- Асосий таркибда амалга оширилган ротация ўзини қанчалик оқлади?

- Ротация 100 фоиз ўзини оқлади, деб айта оламан. Биринчи таймда ҳам голгача ажойиб ўйин ўтказдик. Фақат голдан сўнг жамоа озгина бўшашди. Истаймизми-йўқми, рақиб ҳам майдонда футбол ўйнади. Улар ҳам яхши ҳаракат қилишди. Биринчи таймда тўп сурган футболчиларни асосий вазифаси кўпроқ босим уюштириб, рақибни имкониятларини пасайтириш, иккинчи таймни 60-дақиқасидан кейин устунликни қўлга олишимиз учун биринчи таймда ҳаракат қилган ўйинчиларни ўрни катта бўлди.