Ирландияни илк бор учта бош вазир навбати билан бошқаради 

Ирландияни парламентга сайловлардан 4 ой ўтиб учта партия орасида эришилган келишувга кўра учта бош вазир навбати билан бошқаради.

Ушбу лавозимда “Фианна Файл” либерал-республика партияси етакчиси Михол Мартин, амалдаги бош вазир ва сайловларгача “Фине Гэл” партияси етакчиси бўлган Лео Варадкар ва “Яшиллар партияси” етакчиси Имон Райан ўзаро ўрин алмашади.

Улар яқин 5 йил давомида юқорида келтирилган тартиб бўйича бир-бирлари билан ўрин алмашади. Мартин 2022 йил декабргача бош вазир бўлиб қолади.

Учта партия коронавирус пандемияси вақтида фуқаролар фаровонлиги учун алоҳида мослашувчанликни намойиш қилиш кераклигини таъкидлаб ўтишган.

“Бир неча ой ичида дунё бошдан оёқ ўгирилиб кетди. Барчамизга хавф солаётган нарсага қарши курашда тезда мослашиб, янги альянслар ташкил қилиб ва бирга ишлаб ўзимизни ажаблантира олишимизни намойиш қилдик”, дейилган партиялар дастурида.

Ҳозиргача Ирландияда бош вазирларнинг бундай алмашинуви бўлмаган. Мамлакатда парламент сайловларида кўпчилик ўрин олган партия етакчиси бош вазир бўлган, унинг ўринбосари лавозимини эса ўринлар сони бўйича иккинчи бўлган партия етакчиси эгаллаган. Бироқ 8 февралда ўтган сайловлар анъанавий икки партияли тизимнинг бузилиши билан якунланган. Парламентда энг кўп – 38 та ўринни “Фианна Файл” эгаллаган. Бироқ унинг рақиблардан устунлиги минимал бўлган. “Фине Гэл” 35 ўрин, “Шинн Фейн” эса 37 ўрин олган. Бироқ “Шинн Фейн” аввал “Ирландия республика армияси” террорчи ташкилоти билан яқин алоқада бўлгани сабабли бошқа партиялар у билан коалицияга бирлашишга интилмаган. Шу сабабли “Фианна Файл” ва “Фине Гэл” 12 та ўрин олган “яшиллар” билан бирлашиш бўйича музокаралар олиб борган.     

Эндиликда “Шинн Фейн” бош мухолиф партияга, унинг етакчиси Мэри-Лу Макдоналд эса мухолифат етакчисига айланди.