Ҳиндистон Покистон қўшинларини чегара яқинига жойлаштираётганини билдириб, буни “кескинликни янада кучайтириш учун ҳужум режалари” деб атади

"Ҳиндистон Қуролли кучлари юқори даражадаги жанговар тайёргарлик ҳолатида қолмоқда", — деди Ҳиндистон армияси полковниги София Қуреши.

Шунингдек, Ҳиндистон томони Покистон дронлар, узоқ масофали қуроллар ва қирувчи самолётлардан фойдаланиб мамлакатнинг тинч аҳоли объектларига ҳужум қилганини маълум қилди. Хусусан, Шамбҳу ибодатхонаси ва Жаммудаги турар жойлар нишонга олинган.

Покистон эса ўз ҳаракатларини “мамлакат суверенитети ва зулм остидаги фуқароларини ҳимоя қилиш зарурати” билан изоҳлади ва содир бўлаётган воқеаларни “Ҳиндистон тажовузига самарали жавоб” деб атади. Мамлакат расмийларига кўра, Покистон армияси Ҳиндистон ҳарбий бўлинмаларидан бирининг қўмондонлик марказини йўқ қилган.