Ғузордаги бозорга эшик қолиб, тешикдан киришяпти (видео)

Ғузор тумани деҳқон бозорига кирадиган асосий йўл карантин сабаб ёпиб қўйилган.

Халқ тилида «3 дамаслари тўхтайдиган жой» деб номланган бозорга тушиш йўлидан кунига бир неча минг одам кириб- чиқарди, дейилади "nnews.uz" хабарида.

Бизга етиб келган видеога кўра, одамлар шунда ҳам, хавфли бўлса ҳам, қўйилган тўсиқлардан ошиб ўтишга ҳаракат қилмоқда.

Сабаби, бозорга бошқа йўл билан кириш анча вақтни олади ва ортиқча овворагарчиликларни келтириб чиқарар экан.

Одамларни ҳам тўғри тушуниш керак. Ўзи шундоғам карантин деб фуқароларимиз анча эзилди. Бир тарафдан нарх-навонинг ошиб кетиши, иккинчи тарафдан тақиқлар кўпчиликни чарчатди.
Бу ҳам етмагандек, «отни калласидек» жарималар кўпчиликнинг юкини оғир қилди.

Аслида бозорнинг асосий дарвозаси қолиб «тешикдан» кириб-чиқаётганларни кимдир назорат қилиши, тушунтириш ишлари олиб бориши керак эмасми?

Чунки ўзлари учун йўл очиб олганлар дезинфекция тунелидан ўтишмайди. Ҳарорати ўлчанмайди.
Демак, улар ҳам вирус ташувчиси бўлиши мумкинку.

Нега туман масъуллари, бозор маъмурияти бу ҳолатга бепарво?

Аҳрор Шарипов