Грузия парламенти АҚШ Конгресси Вакиллар палатаси томонидан қўллаб-қувватланган, Грузия расмийларига қарши санкцияларни назарда тутувчи Megobari Act қонун лойиҳасини қоралади.
Грузиялик депутатлар томонидан қабул қилинган баёнотда айтилишича, ҳужжат Тбилисига нисбатан "учта ёлғон айблов"га асосланган.
Грузия парламентарийлари мамлакат демократиядан узоқлашаётгани, Евроатлантика интеграциясини тўсиб қўяётгани, Москва ва Пекин билан яқинлашаётгани ҳақидаги даъволарни рад этмоқда. Уларнинг таъкидлашича, Грузия сайловларни ҳалол ва адолатли ўтказмоқда, Россия билан эса 2008 йилдан бери дипломатик алоқалар йўқ.
"Грузия ва Хитойнинг сиёсий муносабатлари АҚШ ва Хитой муносабатлари билан бир хил даражада," - дейилади баёнотда. Грузиялик депутатларнинг таъкидлашича, 2012 йилдан кейин бирорта ҳам грузиялик сиёсатчи Москвага ташриф буюрмаган.
Megobari тўғрисидаги қонун лойиҳаси АҚШ Вакиллар палатаси томонидан 5 май куни қабул қилинган ва энди Сенатга кўриб чиқиш учун юборилган. Агар маъқулланса, у президент Дональд Трампга имзолаш учун топширилади.
Megobari Act ташаббускори Грузия мухолифатини қўллаб-қувватловчи республикачи конгрессмен Жо Уилсон эди. Актнинг номи грузинча "мегобари" сўзидан олинган бўлиб, "дўст" деган маънони англатади.
Ҳужжатда Грузия раҳбариятига нисбатан "демократиядан чекиниш" ва Россия, Хитой ва Эрон каби авторитар режимлар билан яқинлашиш учун мумкин бўлган санкциялар тўғрисидаги қоидалар мавжуд. Бироқ, агар мамлакат демократия йўлига қайтса ва ташқи сиёсатни ўзгартирса, Грузияни қўллаб-қувватлаш ҳам кўзда тутилган.
